چەوانیا بکارئینانا پێڤاژوویا بۆلۆنیا و موودلی

كۆلێژا زانستێن سیاسی سمینارەك بۆ قوتابیان ل دۆر جێبەجێکرنا پێڤاژۆیا بۆلۆنیا و بکارئینانا پلاتفۆرمێ موودلی سازکر

ل ناڤەندا قوتابیان یا زانکۆیا دهۆك، کۆلێژا زانستێن سیاسی سمینارەك ل دۆر بکارئینانا پلاتفۆرمێ موودلی (UOD Moodle) و خواندنێ ل دویڤ پێڤاژۆیا بۆلۆنیا، ئەڤرۆ، ل ٢٠ـی ئیلۆنا ٢٠٢٦ ئەنجامدا .

د ڤێ سمینارێ دا کو ب ئامادەبونا راگرێ کۆلیژێ، د. هەوار خەلیل تاهر برێڤەچووی، و ژ لایێ مامۆستایێ کۆلیژێ مەلەڤان ئەحمەد حەجی ڤە هاتیە پێشکێشکرن، گرنگیەکا تایبەت ب پلاتفۆرمێ موودل (Moodle) هاتە دان—کو ژینگەهەکا فێربوونا دیجیتالی یا جیهانی یە و قوتابی و مامۆستایان پێکڤە گرێددەت بۆ بەلاڤکرنا وانەیان، وەرگرتن و ئەپلۆدکرنا ئەرکێن مالێ (Homework)، و پشکداریکرن د پرۆسەیا خواندنێ دا ب شێوەیێ ئۆنلاین. هەروەسا، د نۆکە دا ئەڤ پلاتفۆرمە یێ بوویە ئالاڤێ سەرەکی یێ پەیوەندیکرنێ دناڤبەرا مامۆستا و قوتابیان ل زانکۆیا دهۆك.

دیسان هاتە رۆنکرن کو سەرەدانێن بەردەوام یێن قوتابیان بۆ ناڤ پلاتفۆرمێ موودلی دێ بنە بنەمایەك بۆ هەلسەنگاندنا وان ژ لایێ مامۆستایان ڤە. زانکۆیا دهۆك ب رێیا کاراکرنا پلاتفۆرمێن دیجیتالی، پابەندبوونا خۆ بۆ دابینکرنا ژینگەهەکا فێربوونا سەردەمیانە دوپات دکەت، کو ئەڤە پێنگاڤەکا گرنگە د پرۆسەیا ڤەگوهاستنا دیجیتالی دا.